Гьанив жанив кьижарав
Инсан гьитIинго вуго, -
Я бахIарчи лъугьина,
Я хIалихьат вахъина.

Гьаб гьитIинаб бусен тун
Инсан чанги регIана:
Цоял рагъда тIагIана,
Цоял кьалда кьерана.

Дун кIибикIун улбуца
КучIдул чанги ахIана,
КочIолъ рехсарал гIадал
ГIемерисел рахъинчIо.

Динга-дванги, динга-дванг –
Дун кIибикIулеб буго.
КIудияв инсан вуго
ГьитIинаб макьуялда.

Дир мокъида керен цун
Эбел йиго пикрабалъ,
Гьаб гьитIинаб лъимадул
Лъугьунев чи лъачIого.