Къо-мех лъикI, хирияй, лъикI йикIа, гьудул,
Керен-ракI гьаниб тун дун унев вугин.
Вореги, хирияй, кIочене тоге,
КIиялгоги рекъон гьабураб къотIи.

Гьоркьор къоял ина, къотIи цIунила,
Щулалъун гурони, гьеб биххиларо.
Нилъ рокьуларелги ва рихаралги,
Балагьун хутIила, нилъ данделъила.

Гьоркьор санал ина данделъичIого,
Гьудул, дур рокьуе хилиплъиларо.
МугIрул рихханиги биххизе гьечIеб,
Гьалагаб дир гIищкъу дуца цIунилищ?

Боркьараб кор гIадаб гьаб дир каранда,
Кидаго букIина дур цIар жен-желеб.
Бихьея цо квер кье нух битIиялъе,
Къо-мех лъикI, хирияй, дун унев вугин.