Нухдасан унаго дуй саламги кьун,
Сасуна кидаго дур хабада дун.
Къулгьу-алхIам цIалун дугIаги гьабун,
Дур зонохъ валагьун гIодов чIола дун.

Граниталъул гамачI, чIегIераб зани,
ЧIегIераб зонода бикIараб сурат,
Сверун забор ккураб дур къачIараб хоб,
Къалъизабун буго хъахIкьерал ганчIаз.

Дун цевего гIадин духъеги вачIун,
Дуе цIиял харбал рицинин вуго.
Амма гьаб нухалда духъе вачIиндал,
Дуе щиб бицинеб лъачIого вуго.
Мун рагъде витIараб хIукуматги хун,
ХIакимзабаз доб рагъ мекъи гьабуна.
Чанги аза-азар мун гIадиназул,
ГIагарлъи нахъеги къварид гьабуна.

Дур хабада цеве гIодовги вукIун,
ГIащикълъун вуго дун дур пикрабаца,
Амма дур зонода бикIараб сурат,
Сабруялда буго дихъги балагьун.