Дир хириияй эбел, гIемер гIодуге,
Дур васасул къадру жеги цIикIкIана.
ЧIаго вуссинчIилан къварид йикIунге,
ЧIаго хутIаразе гIумру кьун хванин.

Жинде тIаде ккараб налъиги тIубан,
Вас гIадин вачIана, хун вачIаниги.
Жиндирго тIегьалеб гьитIинаб гIумру,
Гьалмагъзаби цIунун кьун бугелъул гьес.

Хирияб ватIанги тIадаб налъиги,
Къиматаб жо букIин бичIчIана гьесда.
Нилъер умумуца намус бацIцIадго,
Ирсалъе цоцахъе цIунизе кьолеб.

Эбел, дуца гьесул бидулъ гьитIинго,
БукIана куцараб ВатIан цIунизе.
Дуй гьабураб къотIи биххичIо гьесул,
ТIубазе щвей ккана жиндирго талихI.
Сабру гьабе, эбел, гIодой йиччан чIа,
БухIараб магIу тIун свакан ятила.
Кисанха нилъехъе Насир вачIинев,
Вуссунарев гьесухъ къварид йикIунге.

Живго хвананиги цIар чIаго буго,
БахIарчи гIадинан хун вугелъул гьев.
Нилъго гIадиназе эркенлъи бокьун,
БахIарго гIумру кьун ракьулъе индал.