Сурат буго батулеб бецIлъи гIурал нохъазда,
Нахъа рижараздаги жиндир магIна бичIч1улеб.
Сурат буго бахъулеб хъахIал нилъер къоязда,
Къарнаби свераниги сагIтил кIутIи рагIулеб.

МагIбудал гьукъаниги, къазе гьечIел суратал,
Сон рукIарал ратизе метерисел рачIуна.
РекIел хIасратги хIакъги хIарпаз хъвачIел аятал,
Аллагьасул гурони, суратал цIакъ релълъуна.

Сурат- канлъулаб рагIад, гIунун батулеб канлъи,
Кииалго гIасрабазе гIахьалаб мацIалъул ицц,
Араб бихьулеб горду, гвангъизесеб балъголъи,
Бахъарасул цIаралъе цIвабигун цолъулеб рецц.

Сурат бахъулеб гьунар гьуинаб калам буго –
КиналгIаги мацIазде жибго буссунеб буго.