Сасикьа Г1умарил Мух1амадил Г1абдурах1им

Гьавуна 1943 абилеб соналъул 15 январалъ Ц1умада районалъул Сасикь росулъ.1957 абилеб соналъ гьеб росдал школалъул анкьго класс ц1алун лъугьизабуна "щуйилал" къиматазда ва ц1ализе лъугьана Мах1ачхъалаялда бук1араб медучилищаялда.

Рокъосан санаг1алъи бук1инч1ого ц1али лъугьич1ого 1959 абилеб соналъул ахиралда акамедический отпуск босун рокъов вач1ана.

Гьелда хадув Сильди,Гьакъо,Хъварши,Сасикь медпункталъул заведующийлъун х1алт1ана.

1963-1964 соназ Хасавюрталда бук1араб профтех училищаялда ц1алана ва гьебги "щуйилазда" лъугьизабуна.

1964 соналъ Ц1ияб Сасикь вач1ана ва гьенивги медпункталъул заведующийлъун х1алт1ана. 1967-1968 соназ совхозалъул учётчик бухгалтерлъунги вук1ана.

1968 соналъ 25 сонил г1умруялде вахарав чияс бай бихьана г1араб мац1 ва исламияб г1елму ц1ализе. Сасикь рук1арал: Г1исал Мах1муд, Г1алил Саг1аду, Аюбил Х1айбула, Х1ажиясул Сайфудин г1адал ц1аларал чаг1азда цебе. Хадуб Хуштадасан к1удияв Мух1амадсайид, Кьохъа Султ1анмух1амад, Мелъелт1аса Сулайман ва цойгидалги г1алимзабаздаса лъай босана.

Дагьаб мехалъ Сириялде ун гьенир ругел г1алимзабаздасанги мунфаг1ат босана. Г1араб г1елму ц1ализе байбихьараб къоялдасан нахъе, жинда лъараб жо цойгидазда малъизеги бай бихьана. Гьелъул х1асилалда лъеберилъаги арал гьесул рук1арал мутаг1илзаби, ц1аларал чаг1илъунги рахъун, росабалъ мажгитазул имамзабилъунги, мадрасазда муг1алимзабилъунги х1алт1улел руго. Г1елму ц1алиялда цадахъ Г1абдурах1имица ях1 бахъана бусурбабазе чара гьеч1ел мажсжидал мадрасаби разеги.

Жеги дин гьукъараб коммунистазул заманаялъ, 1980 соналъ бай бихьана Сасикь росдал масжид ц1и гьабизе. Колхозалъул складги жаниб лъун, бихун унеб бук1ана гьеб. Г1емер г1акъуба бихьун, х1укуматалъул т1алъиялъулго даг1баги гьабун, гьеб масжид ц1и гьабуна, гьенибе т1ок1аб складги биччач1о.

Ц1ияб Сасикь росулъги изну кьураб гьеч1ониги, какал ралеб гьит1инаб масжид бук1ана. 1988 соналъул ахиралда росдал жамаг1атги цадахъ лъугьинабун, гьезие нухмалъиги гьабун, байбихьана ц1ияб масжид базе. Гьеб бук1ана Дагъистаналдаго ц1ияб балеб т1оцебесеб масжид. Хадур лъугьун х1укуматалъул х1алт1ухъабиги рук1ана квал-квал гьабулел. Ункъо моц1 г1анасеб мехалда жаниб масжид бан лъуг1ана ва жакъаги гьеб росдал аслияб масжидлъун буго.

Гьелдасан хадубги росулъ к1иго мадраса баялъе нухмалъи гьабуна, жеги цойги авалмасжидги бана.

2007 соналъ живги, жиндирго хъизанги х1алт1ун ясал ц1алулеб мадраса ва авал масжид бана.

1984 соналъ бай бихьун, Г1абдурах1имица ункъо соналъ т1ад х1алт1ун Къуръаналъул тафсир Жалалазул таржама гьабуна, г1араб мац1алда т1ад г1уц1араб г1ажам х1арпаз, квералъги хъван. (лъабго том) Гьелъул мурад бук1ана, мутаг1илзабазе тафсир лъаялъе кумек гьаби. Гьелда г1адамазул бугеб х1ажалъи бихьун 1989 соналдасан байбихьун балъго зарбуялдаги кьабун, щуазарго т1ехь къват1иб биччана ва г1адамазухъе щвана.

2002 соналъ жинцаго компютер х1алт1изеги лъазабун, гьебго таржама г1урус х1арпаздалъунги хъван, г1емерал цойги тафсиралъул г1алимзабазул тафсираздасанги мунпаг1ат босун, цойги таржама гьабуна. (к1иго том). Гьел т1ахьал цо нухалъ Дагъистаналда зарбуялда рахъана, гьел х1ажалъи бугелщиназе г1еч1елъул, цойги нухалъ Сириялдаги рахъана. Гьел т1ахьал маг1арулазул киналгоязде г1агарун росабалъ г1адамазухъ руго.

2005 соналъ машгьурав г1алим Ан-нававияс данде гьабураб " риязу свалих1ина" абураб т1ехьалдасан х1адисал т1аса рищун, гьезие тафсир (комментария) гьабун, маг1арулазе анкьнусго гьумер бугеб цойги т1ехь къват1ибе биччана. Чанго гьит1инаб т1ехь, ва чанго шарг1ияб масъала зарбоялда рахъана.

Гьабсаг1ат зарбоялда кьун буго г1урус мац1алда Къуръаналъул лъабго ахираб жузалъул тафсир. Гьеб буго цойги мац1 бицунел лъимал ц1алулеб мадрасалъе х1адурараб т1ехь.

Гьединго г1урус мац1алда х1адурун буго ва кват1ич1ого къват1ибе бач1ине буго Фикъгьиялъул масъалаби жанир ругеб т1ехь.

Гьеб ц1акъго х1ажатаб х1алт1и буго мадрасазе ва киналго бусурбабазе.

Гьесул т1ахьал цойгидазул г1адин г1исинал барашюраби гурел ругел, гьел руго ч1ах1иял, т1ад г1емераб х1алт1абиги гьарурал, г1елму ц1алулезеги, гьелда рокьи бугезеги к1удияб пайда-хайир кьолел

Росдалги Дагъистаналъулги жамг1ияб х1алт1улъги Г1абдурах1имица жигараб г1ахьаллъи гьабуна. Гьесул квербакъиялдалъун рагьана Ц1ияб Сасикь росдал Администрация. Бана росулъ т1ощел хенолеб гьобо.

1978-1980 соназ гьев х1алт1ана Сасикь росдал "Рекъел" колхозалъул бухгалтерлъун.

1992-1993 соназ гьев вук1ана динияб идараялъул муфтиясул заместителлъун ва г1алимзабазул советалъул бет1ерлъун.

1994 соналъ бет1ерлъи гьабуна Хасавюрталда рагьараб Имам Гъазалил ц1ар кьураб Исламияб институталъе.

Бицун х1ал к1олареб г1адаб квер бакъана Г1абдурах1имица Дагъистаналда Ислам цебет1еялъе. Инкъилаб ккезег1ан цебе Ч1охъа Мух1амадмирза Мавраевасул басмаханаялда рахъарал гурел, т1ок1аб хаду т1ахьал риччазе рес кибе бук1араб. Бук1арабги г1елмуги, Къуръаналги т1аг1ун лъуг1ун гурищ рук1арал Дагъистаналда. Коммунистазул замналдаги, Тафлисалда , Бакуялда унги балъго рахъизарун, Къуръаналги г1ажамги, г1арабги т1ахьалги рач1унаан гьес бусурзабазе. Гьеб сабаблъун х1укуматалъул идарабазул данде ккунгут1иги бук1унаан гьесул.

Г1абдурах1имици тарбия кьун г1езабуна анц1го лъимер. Гьел киналго руго исламияб дин ккурал. Росдае х1ажаталъур ратулел. Чанго нухаллъ х1ежги борхана гьес.

Божи буго Г1абдурах1имица жегиги г1емераб х1алт1и гьабилин Дагъистаналда Ислам цебе т1еялъе.