Хабал къотIун унаго
Лъалхъе цохIо лахIзаталъ,
Дунги мунго гIадинав
Инсан вукIин кIочонге.

Салам кьезе чIухIарав
ЧIаго хьвадулев янгъиз
КигIан кIичIарданиги,
Дурги ахир гьаб буго.

Сапаралъ вугев гьудул,
Дун рокъове щун вуго,
Мун гьоболлъухъа вуссун
Дихъе вачIине вуго.

Гьаб зонода гъоркь кьижун
Кьварарав инсан вуго.
Инсанасул суратгун
Сверулев бахIри вуго.

Гьаниб кинабго буго,
Камураб щибго гьечIо,
Дуца бикъа-хъамулеб
Гьанибе гьукъун буго.

Нижер кIигоял руго:
Цояв - пача, цояв – лагъ,
КIиязулго магIишат –
Лъаб-лъаб метралъул мусру.

Нилъей ханлъи гьабурав
Гьанив нижер лагъ вуго,
Лагълъун вукIарав илчи
Гьасие лагълъун вуго.