Гьал дир пикрабазул посилкаги цIун
ЦIумаде гIурухъе буго битIулеб.
Цинги дир къасдазул къандалъо баччун,
Къойил ТIиндие дун йиго къокъуней.

Дун гьитIинго тараб дир инсул росу,
РакIалда дун щолищ дида мун гIадин.
Дихъ балагьун чIараб хирияб Санух,
Сабру лъугIун бугищ божи хун бугиш?

Дунали абуни гьаб шагьаралда,
Гьабун лъугIин гьечIеб хIалтIуда йиго
Духъ юссунеб сагIат тIаде щолаго,
ТIамулей ятула гьеб метералде.

ГодекIанир гIодор чIарал хараби,
Харбида ратила церего гIадин.
Дир инсул кьерилал, росдал намус яхI,
Нужор адаб дица кибго рехичIин.

Дир гьалбал хириял росдал гIадамал,
ГIайиб чIваге дида дун кватIунилан.
Урхъараб саламгун, цIиял кучIдулгун,
ЯчIуней йиго дун, чIа дихъ балагьун.