Доб, Австралиялъул Сиднеялдаса,
СагIид, мун бергьанин хабар бачIиндал.
ТIолго цIумадисез рекIелъ чIухIигун,
Борханин цо-цо лълъар дур сахлъиялъе.

Къуваталщиназул мугъги цвинабун,
Сорозе ричанин дуца дандиял.
Дур махщелгун гьунар бихьун хадуса,
Хъат кьабунин дуе тIолго дунялалъ.

Турказул ракьалда-Анкараялда,
Меседил медаль щун мун тIад вуссиндал,
Кутакаб рохигун рекIелъ чIухIигун,
Гьадин хъван букIана гьабго пероялъ:

«Щулаго ккве месед, ракIчIун а цеве,
Шагьранух бугин дуй Олимпиялде.
Куркьбал гъе хеккого, лъадаре гьеб черх,
Жеги цойги медаль цIакъ хIажат бугин…»

Гьеб гьариги тIубан мун тIадвуссиндал,
Дуй гIицIго гьарила рохелгун талихI.
МеседгIан бацIцIадаб баркат цIикIкIараб,
Берцинаб, гьайбатаб, гьарзаяб гIумру.


РикIкIадаб доб Сидней Австралиялъул,
Нилъер тарихалъулъ хутIила даим.
ЦIумадисезул вас-мугIрул къвекIаб цIум,
ГIасрудул чемпион нилъее кьурав.

ТIолго цIумадисез баркулеб буго,
Олимпалъул месед тIоцебе щвараб.
ЦIун рорхулел руго жегиги лълъарал
КъвакIарав, СагIид, дур хIурматги гьабун.

Ракълил чапаралъул гвангъараб чирахъ,
КенчIезе гьабунин дуца ЦIумада,
Бищунго борхатаб тIогьивги вахун,
ТIолго улкаялъе нур кьунин дуца.