Абдулхабировги, гьесул дунялги,
ГIадан хIисабалда тIадегIанлъиги,
Недегьаб гьимигин роцIцIараб гIакълу,
Унтаразда аскIоб унеб цо гIумру.

ГIадан аскIов цIалев гьав ЦIумадисев
ЦIвайил борхалъуде вахун вихьула,
Москваялда гIумру тIамуниги щиб,
МагIарул намусги яхIги цIунарав.

Кида мун вуссинев Дагъистаналда
Дуде урхъун ругин гIакъилал чагIи.
Шагьарго урхъараб ургъел букIуна,
Мун гIадал къадруял швезе кватIидал.

Исламалда цIарги партияйин лъун,
ЛъикIал магIарулал мекълъулел руго,
Нижгун гьечIони нуж шайтIангун ругин
Гаргалел рагIичIищ лидерал гьелъул.

Абдулхабировги гьесул дунялги
Динияб рахъ ккведал камиллъун ана.
Иман бугеб чорхолъ бакараб чирахъ,
РикIкIад ругониги, дур канлъухъ руго.